Amerika texnologiyalar universiteti bilan hamkorlik yo‘lga qo‘yildi

2-iyun kuni Amerika texnologiyalar universiteti (American university of technology) va Oliy ta’lim, fan va innovatsiyalar vazirligi huzuridagi Oliy taʼlim tizimi kadrlarini qayta tayyorlash va malakasini oshirish instituti o‘rtasida muhim ahamiyatga ega hamkorlik memorandumi imzolandi.
Hujjat doirasida oliy ta’limda ilg‘or metodika va texnologiyalarni joriy etish, pedagog va rahbar kadrlar malakasini oshirish, ilmiy-tadqiqotlar va innovatsion loyihalarni qo‘llab-quvvatlash kabi yo‘nalishlarda hamkorlikka erishiladi.

Shuningdek, mazkur hamkorlik O‘zbekiston oliy ta’lim tizimida innovatsion yondashuvlarni joriy etish, ilg‘or xalqaro tajribalarni o‘rganish hamda professor-o‘qituvchilar salohiyatini oshirish yo‘lida muhim ahamiyat kasb etadi.

Ma’lumot uchun, ushbu universitet — Amerika qo‘shma shtatlaridagi Cintana Education xalqaro tashkiloti a’zosi bo‘lib, Arizona davlat universiteti bilan hamkorlikda faoliyat yuritadi.