O‘zbekiston gimnastikachilari Jahon kubogi bosqichini 10 ta medal bilan yakunladi

Toshkentda o‘tkazilgan badiiy gimnastika bo‘yicha Jahon kubogida O‘zbekiston terma jamoasi 2 oltin, 5 kumush va 3 bronza medalini qo‘lga kiritdi. Yakkalik mashqlarda Taxmina Ikromova Olimpiada chempionini yengib, birinchi o‘rinni egalladi, guruh mashqlarida o‘zbekistonlik gimnastikachilar ikkinchi o‘rindan joy oldi.

Toshkent shahrida 26 davlatdan 100 dan ortiq sportchi ishtirok etgan badiiy gimnastika bo‘yicha Jahon kubogining uchinchi bosqichi yakunlandi. O‘zbekiston terma jamoasi yuqori natijalar ko‘rsatib, jami 10 ta medalni (2 ta oltin, 5 ta kumush va 3 ta bronza) qo‘lga kiritdi, deb xabar qildi Milliy olimpiya qo‘mitasi matbuot xizmati.
Yakkalik bahslarda Taxmina Ikromova halqa bilan mashq bajarishda oltin medalni qo‘lga kiritdi. Shuningdek, u to‘p va tasma mashqlarida uchta kumush, bulava bilan esa bronza medalini qo‘lga kiritdi.
Anastasiya Saranseva jamoa hisobiga ikkita kumush (halqa va bulava) va bitta bronza medalni (to‘p) qo‘shib qo‘ydi.

Ko‘pkurash mashqlarida Evelina Atalyans, Maftuna Zairova, Adela Fayzulina, Mumtozabonu Isxoqzoda, Amaliya Mamedova va Irodaxon Sodiqovadan iborat jamoa kumush, finalda 3 ta to‘p va 2 ta halqa bilan mashq bajarishda bronza medaliga sazovor bo‘ldi.